ភ្នំពេញ៖ ប្រធានគណៈកម្មការកិច្ចការបរទេស នៃរដ្ឋសភាអាមេរិក លោក Gregory Meeks បានសម្ដែងនូវការពេញចិត្តចំពោះការវិវត្តន៍នៃទំនាក់ទំនងកម្ពុជា-អាមេរិក ក្នុងនោះដែរលោកបានអះអាងថា «សហរដ្ឋអាមេរិកចាត់ទុកសម្ដេចជា មិត្ត ហើយនឹងធ្វើការយ៉ាងជិតស្និតជាមួយសម្ដេចតេជោទៀតផង។
ក្នុងសេចក្ដីប្រកាសព័ត៌មានចុះថ្ងៃទី២៤ ខែវិច្ឆិកា ឆ្នាំ២០២២នេះពីជំនួបរវាងសម្ដេចតេជោ ហ៊ុន សែន និងលោក Gregory Meeks កាលពីល្ងាចម្សិលមិញ ក្រសួងការបរទេសបានឱ្យដឹងថាលោក Gregory Meeks បានអះអាងចំពោះមុខ សម្ដេចតេជោ ហ៊ុន សែន ថាអាមេរិកចាត់ទុកសម្ដេចជា «មិត្ត» ខណៈដែលសម្ដេចតេជោនាយករដ្ឋមន្ត្រីបានគូសបញ្ជាក់ថា ទំនាក់ទំនង កម្ពុជា-អាមេរិក នាពេលបច្ចុប្បន្ន មានភាពល្អប្រសើរជាងពេលណាៗទាំងអស់ ចាប់តាំងពីការបង្កើតទំនាក់ទំនងការទូតកាលពី ៧២ឆ្នាំមុន ហើយថាប្រទេសទាំងពីរនឹងក្លាយជាដៃគូនាពេលអនាគត។
ក្នុងជំនួបនោះសម្ដេចតេជោ ហ៊ុន សែន ក៏បានបញ្ជាក់ពីដំណើរការប្រជាធិបតេយ្យនៅកម្ពុជា និងការត្រៀមខ្លួនសម្រាប់ការបោះឆ្នោតថា្នក់ជាតិនាពេលខាងមុខ ហើយក៏បានឆ្លើយតបនឹងបញ្ជាក់ជាថ្មីពីមូលដ្ឋានកងទ័ពជើងទឹករាមដែលសម្ដេចបញ្ជាក់ថា៖ «ជំហរម៉ឺងម៉ាត់របស់កម្ពុជា មិនអនុញ្ញាតឱ្យមានវត្តមានមូលដ្ឋានយោធាបរទេសណាមួយនៅលើទឹកដីកម្ពុជាដូចដែលត្រូវបានហាមឃាត់ដោយរដ្ឋធម្មនុញ្ញ និងបានធានាអំពីតម្លាភាពក្នុងការប្រើប្រាស់កំពង់ផែនេះផងដែរ»។
ក្រសួងការបរទេសបានកត់សម្គាល់ពីកិច្ចប្រជុំនេះថាបានប្រព្រឹត្តិតទៅដោយលក្ខណៈត្រង់ទៅត្រង់មក និងក្នុងបរិយាកាសមិត្តភាព និងស្និទ្ធស្នាល៕
